చీకటి పడింది.. నగరమంతా నిద్రపోతోంది.. కానీ చంచల్గూడ జైలు గోడల మధ్య ఒక మనిషి మెదడులో మాత్రం కుట్ర నిశితంగా పదునుదేరుతోంది. అతను ఎవరో కాదు.. చోరీ కేసులో అరెస్టయిన సయ్యద్ అమీర్ హుస్సేన్. కటకటాల వెనుక అతనికి గడపడం అస్సలు నచ్చలేదు. ఎలాగైనా బయటపడాలి.. ఇది అతని ఏకైక లక్ష్యం.
అతను పన్నిన వ్యూహం వింటే ఎవరికైనా వెన్నులో వణుకు పుడుతుంది. మనిషి కడుపులోకి ఇనుప మేకులను పంపి.. వైద్యులనే నమ్మించి.. ఆస్పత్రికి వెళ్లడం ఒక ప్లాన్ అయితే, అక్కడి నుంచి అదృశ్యమవ్వడం మరో ఎత్తుగడ. అనుకున్నదే తడవుగా జైలులో అతను మేకులను మింగేశాడు. కడుపునొప్పితో విలవిలలాడుతుంటే, ప్రాణాపాయం అని భయపడిన పోలీసులు అతడిని గాంధీ ఆస్పత్రికి తరలించారు.
కానీ, ఆస్పత్రిలో అడుగుపెట్టిన క్షణం నుంచే అతను తన అసలు ఆట మొదలుపెట్టాడు. వైద్యులు, సిబ్బంది, పోలీసులు.. అందరి కళ్ల ముందు ఉన్నా కూడా, అతను ఎలా పారిపోయాడో ఎవరికీ అర్థం కావడం లేదు. అసలు అతను ఆస్పత్రిలోకి వెళ్ళిన తర్వాత ఏం జరిగింది? పోలీసులు నిద్రపోతున్నారా.. లేక అతనికి ఎవరైనా సహకరించారా? ఆ మేకులు మింగిన మనిషి ఇప్పుడు ఎక్కడున్నాడు? ఆ చుక్కల చీకటిలో అతను ఎక్కడికి మాయమయ్యాడు? ఈ మిస్టరీ వెనుక ఉన్న అసలు నిజాలు బయటపడాలంటే.. అంతర్గత విచారణలో ఎవరెవరి మెడకు ఉచ్చు బిగుస్తుందో వేచి చూడాలి.
ఈ ఉత్కంఠభరితమైన ఘటనలో పోలీసుల నిర్లక్ష్యం ఏ స్థాయిలో ఉందో త్వరలోనే స్పష్టం కానుంది. అసలు ఆ రాత్రి గాంధీ ఆస్పత్రిలో ఏం జరిగిందో తెలుసుకోవాలని మీకు కుతూహలంగా ఉందా?
రిపోర్టింగ్: జర్నలిస్ట్ రాఘవ బంగారు | 9849171290
