గద్వాల ప్రభుత్వ ఆసుపత్రిలో చోటుచేసుకున్న ఉప్పరి ఇందు (17) మృతి ఘటనపై జిల్లా యంత్రాంగం స్పందించింది. వైద్యుల నిర్లక్ష్యమే బాలిక ప్రాణం తీసిందని కుటుంబ సభ్యులు, స్థానికులు ఆందోళనలు చేపట్టిన నేపథ్యంలో, జిల్లా కలెక్టర్ రిజ్వాన్ బాషా షేక్ ఆదివారం కీలక నిర్ణయం తీసుకున్నారు. ఈ ఘటనపై నిజా నిజాలు నిగ్గుతేల్చేందుకు ఆరుగురు సభ్యులతో కూడిన స్వతంత్ర విచారణ కమిటీని నియమిస్తూ ఆయన ఉత్తర్వులు జారీ చేశారు.
సమగ్ర విచారణకు ఆదేశాలు:
బాధిత విద్యార్థిని ఇందు గత శుక్రవారం అపెండిసైటిస్ నొప్పితో ఆసుపత్రిలో చేరగా, శనివారం ఆపరేషన్ సమయంలో మృతి చెందడం జిల్లాలో తీవ్ర సంచలనం సృష్టించింది. ఈ నేపథ్యంలో, మృతురాలికి సంబంధించిన కేసు షీట్, ట్రీట్మెంట్ నోట్స్, లేబోరేటరీ రిపోర్ట్స్ మరియు ఇతర సంబంధిత పత్రాలను నిశితంగా పరిశీలించి సమగ్రంగా విచారణ జరపాల్సిందిగా కలెక్టర్ కమిటీ సభ్యులను ఆదేశించారు.
అధికారులకు హెచ్చరిక:
విచారణ ప్రక్రియకు ఆసుపత్రి పర్యవేక్షకులు, సంబంధిత వైద్యాధికారులు పూర్తిస్థాయిలో సహకారం అందించాలని కలెక్టర్ స్పష్టం చేశారు. ఒకవేళ విచారణలో ఏవైనా అడ్డంకులు సృష్టించినా లేదా కమిటీకి సహకరించకపోయినా, సంబంధిత అధికారులపై నిబంధనల ప్రకారం తీవ్రమైన చర్యలు తీసుకుంటామని ఆయన హెచ్చరించారు. విచారణ పూర్తయిన తర్వాత సమర్పించే నివేదిక ఆధారంగా, బాధ్యులపై కఠిన చర్యలు ఉంటాయని ఆయన హామీ ఇచ్చారు.
రిపోర్టింగ్: రాఘవ బంగారు | 9849171290
ఇలాంటి మరిన్ని వార్తలు కోసం మన ఛానల్ ఫాలో అవ్వండి, మీ మిత్రులకు ఈ వార్తను షేర్ చేయండి.
