జోగులాంబ గద్వాల జిల్లా ప్రభుత్వ ఆసుపత్రిలో వైద్యుల నిర్లక్ష్యం మరోసారి పరాకాష్టకు చేరింది. అపెండిక్స్ ఆపరేషన్ కోసం వచ్చిన ఎర్రవల్లికి చెందిన ఉప్పరి ఇందు (17) అనే బాలిక, సరైన చికిత్స అందక ప్రాణాలు కోల్పోవడం స్థానికంగా తీవ్ర కలకలం రేపింది. ఆపరేషన్ సక్సెస్ అని కుటుంబ సభ్యులను నమ్మబలికి, అసలు విషయాన్ని దాచిపెట్టి, మృతదేహాన్ని అంబులెన్స్లో తరలించేందుకు ఆసుపత్రి సిబ్బంది ప్రయత్నించడం వారి అమానవీయ ప్రవర్తనకు నిదర్శనం.
స్వంత వ్యాపారాలపైనే వైద్యుల మోజు:
ఈ దారుణ ఘటన వెనుక, ఆసుపత్రికి రావాల్సిన వైద్యులు తమ స్వంత వ్యాపారాలపైనే ఎక్కువ దృష్టి సారిస్తున్నారనే ఆరోపణలు ఇప్పుడు గద్వాల జిల్లాలో పెద్ద ఎత్తున చర్చకు దారితీస్తున్నాయి. ప్రభుత్వ ఆసుపత్రిలో ఉండాల్సిన సమయాల్లో కూడా కొంతమంది వైద్యులు తమ స్వంత క్లినిక్లు, ప్రైవేట్ ప్రాక్టీసులకే ప్రాధాన్యత ఇస్తున్నారనే విమర్శలు ఉన్నాయి. ప్రభుత్వ జీతాలు తీసుకుంటూనే, బయట ప్రైవేట్ వైద్యం ద్వారా అడ్డగోలుగా సంపాదించడమే లక్ష్యంగా వ్యవహరిస్తున్నారని స్థానికులు మండిపడుతున్నారు. ఇందు వంటి బాధితులకు సరైన సమయంలో చికిత్స అందకపోవడానికి ప్రధాన కారణం ఇదేనని, వైద్యులు తమ వ్యాపారాల పట్ల ఉన్న మోజులో ప్రభుత్వ విధులను నిర్లక్ష్యం చేస్తున్నారని బాధితుల బంధువులు ఆరోపిస్తున్నారు.
న్యాయం కోసం అడిగితే అరెస్టులా?
ఈ విషాదానికి బాధ్యులైన వారిపై చర్యలు తీసుకోవాలని, ఆసుపత్రి వ్యవస్థను ప్రక్షాళన చేయాలని డిమాండ్ చేస్తూ ఆందోళన చేస్తున్న వారిని పోలీసులు అరెస్టు చేయడం స్థానికంగా తీవ్ర చర్చనీయాంశమైంది. తమకు జరిగిన అన్యాయంపై గళమెత్తిన వారిని అదుపులోకి తీసుకోవడం పట్ల మృతురాలి కుటుంబ సభ్యులు మరియు గ్రామస్తులు ఆవేదన వ్యక్తం చేస్తున్నారు. “మేము అడిగింది న్యాయం, కానీ మాకు దక్కింది అరెస్టులు” అంటూ వారు రోదిస్తున్నారు. ఆందోళన చేస్తున్న వారిని చెదరగొట్టడానికి పోలీసులు అరెస్టుల బాట పట్టడం, అక్కడి పరిస్థితిని మరింత ఉద్రిక్తంగా మార్చింది.
ప్రభుత్వ ఆసుపత్రి ప్రక్షాళన ఎప్పుడు?
కేవలం ఘటన జరిగినప్పుడు అరెస్టులు చేయడం పరిష్కారం కాదని, ఆసుపత్రి నిర్వహణలో ఉన్న లోపాలను సరిదిద్దాలని స్థానికులు డిమాండ్ చేస్తున్నారు. ఆసుపత్రిలో మెరుగైన సౌకర్యాలు కల్పించాలని, బాధ్యతారహితంగా వ్యవహరిస్తున్న సిబ్బందిపై చర్యలు తీసుకోవాలని వారు కోరుతున్నారు. ఇప్పటికైనా జిల్లా ఉన్నతాధికారులు జోక్యం చేసుకుని, ఆసుపత్రిలో జరుగుతున్న నిర్లక్ష్య వైఖరిని సరిదిద్దాలని, అరెస్టులు ఆపి చర్చల ద్వారా సమస్యను పరిష్కరించి, ఆసుపత్రిని పూర్తిస్థాయిలో ప్రక్షాళన చేయాలని ప్రజలు మరియు ప్రజా సంఘాలు డిమాండ్ చేస్తున్నాయి.
రిపోర్టింగ్: జర్నలిస్ట్ రాఘవ బంగారు | 9849171290
ఇలాంటి మరిన్ని వార్తలు కోసం మన ఛానల్ ఫాలో అవ్వండి మీ మిత్రులకు ఈ వార్తను షేర్ చేయండి.
