భారతీయ ఐటీ పరిశ్రమ ప్రస్తుతం తీవ్రమైన ఒడిదుడుకులను ఎదుర్కొంటోంది. గత కొన్నేళ్లుగా సాఫ్ట్వేర్ రంగంలో ఉద్యోగాల వెల్లువ చూసిన నిరుద్యోగులకు, ఐటీ నిపుణులకు ప్రస్తుత పరిస్థితులు కొంత ఆందోళన కలిగిస్తున్నాయి. ప్రముఖ స్టాఫింగ్ సంస్థ ‘ఎక్స్ఫెనో’ (Xpheno) విడుదల చేసిన తాజా నివేదిక ప్రకారం, దేశంలో ఐటీ ఉద్యోగాల భర్తీ ప్రక్రియ భారీగా మందగించింది. ప్రస్తుత జూన్ నెలలో యాక్టివ్ ఉద్యోగాల సంఖ్య కేవలం 93,000 కు పడిపోయింది, ఇది గత 28 నెలల్లోనే అత్యంత కనిష్ఠ స్థాయి కావడం గమనార్హం. గత నెలతో పోలిస్తే ఏకంగా 14 శాతం మేర ఉద్యోగ అవకాశాలు తగ్గిపోవడం ఐటీ రంగంలో వస్తున్న మార్పులకు అద్దం పడుతోంది.
కృత్రిమ మేధస్సు ప్రభావం, మారుతున్న నియామకాలు:
ఈ భారీ తగ్గుదలకు ప్రధాన కారణం ఆర్టిఫిషియల్ ఇంటెలిజెన్స్ (AI) సాంకేతికత వేగంగా విస్తరించడమేనని ఆర్థిక నిపుణులు విశ్లేషిస్తున్నారు. టీసీఎస్, విప్రో, ఇన్ఫోసిస్ వంటి ఐటీ దిగ్గజాలు సాఫ్ట్వేర్ డెవలప్మెంట్లో ఏఐ టూల్స్ వాడకాన్ని విపరీతంగా పెంచేసాయి. దీనివల్ల గతంలో లాగా వందల సంఖ్యలో సాధారణ ఐటీ ఉద్యోగులను తీసుకునే సంస్కృతికి కంపెనీలు స్వస్తి పలుకుతున్నాయి. తక్కువ మందితో, నైపుణ్యం ఉన్న చిన్న బృందాల ద్వారా ఎక్కువ ఫలితాలను సాధించడంపైనే యాజమాన్యాలు దృష్టి పెడుతున్నాయి. ఫలితంగా సాంప్రదాయ కోడింగ్, టెస్టింగ్ వంటి సాధారణ ఐటీ ఉద్యోగాల సంఖ్య తగ్గిపోతోంది. కేవలం ఏఐ, క్లౌడ్ కంప్యూటింగ్ వంటి ప్రత్యేక నైపుణ్యాలు (Specialized Skills) ఉన్నవారికే ఇప్పుడు మార్కెట్లో డిమాండ్ ఉంటోంది.
అమెరికా వీసా ఆంక్షలు, పెరుగుతున్న పోటీ:
ఇలాంటి క్లిష్ట పరిస్థితుల్లో అమెరికాలోని హెచ్-1బీ (H-1B) వీసా నిబంధనల్లో వస్తున్న మార్పులు, అక్కడ జరుగుతున్న ఉద్యోగాల తొలగింపులు భారతీయ మార్కెట్పై అదనపు భారాన్ని మోపుతున్నాయి. అమెరికాలో ఉద్యోగాలు కోల్పోయిన వేలాది మంది భారతీయ టెక్ నిపుణులు తిరిగి స్వదేశానికి వచ్చేస్తున్నారు. ఇప్పటికే దేశీయంగా ఉద్యోగాల కొరత వేధిస్తుండగా, విదేశాల నుండి అనుభవజ్ఞులైన నిపుణులు కూడా తోడవడంతో ఇక్కడి మార్కెట్లో పోటీ ఊహించని స్థాయికి చేరింది. ప్రస్తుతం ఉన్న ఖాళీలలో దాదాపు 46,000 ఉద్యోగాలు కేవలం మిడ్-సీనియర్ స్థాయి వారికే ఉండటం వల్ల, కొత్తగా కాలేజీల నుండి బయటకు వచ్చే ఫ్రెషర్లకు అవకాశాలు దక్కడం చాలా కష్టంగా మారింది. ఐటీ రంగం మళ్లీ పూర్వవైభవాన్ని అందుకోవాలంటే మరికొన్ని త్రైమాసికాలు పట్టే అవకాశం ఉందని మార్కెట్ వర్గాలు భావిస్తున్నాయి.
రిపోర్టింగ్: రాఘవ బంగారు | 9849171290
ఇలాంటి మరిన్ని వార్తల కోసం మన ఛానల్ ఫాలో అవ్వండి మీ మిత్రులకు ఈ వార్తను షేర్ చేయండి.
